Të paktën pesë persona kanë humbur jetën dhe dhjetëra të tjerë janë plagosur pas një zjarri të fuqishëm që përfshiu një pallat 10-katësh në në Belgjikë. Flakët shpërthyen në katin e tetë të ndërtesës, ku jetonin mbi 200 banorë, duke u përhapur me shpejtësi në një pjesë të madhe të pallatit. Ekipet e zjarrfikësve dhe të emergjencës mbërritën menjëherë në vendngjarje, duke bërë të mundur edhe evakuimin e banorëve dhe kërkimin e personave që mund të kishin mbetur të bllokuar. Pamjet dramatike nga vendi i ngjarjes tregojnë momentin kur një banor zbret nga ballkoni i apartamentit të tij drejt dritares së një apartamenti fqinj, në përpjekje për t'i shpëtuar flakëve dhe tymit të zi që kishte pushtuar ndërtesën. "U detyruam të qëndronim të izoluar në apartament dhe pritëm në ballkon. Brigada e zjarrfikësve erdhi rreth 10 minuta më vonë dhe na shpëtoi me shkallët e tyre", rrëfeu një nga banorët e evakuuar. Zëdhënësja e policisë, Kim Bastien, konfirmoi se zjarri ishte shumë serioz, ndërsa disa persona kanë pësuar plagë të rënda dhe janë transportuar në spital. Edhe Departamenti i Zjarrfikësve bëri të ditur se flakët nuk ishin vënë plotësisht nën kontroll, por përhapja e tyre ishte ndalur, ndërsa ekipet vazhduan kontrollin e çdo apartamenti për të siguruar se nuk kishte persona të mbetur brenda. Autoritetet po hetojnë shkaqet e zjarrit, ndërsa bilanci i viktimave dhe i të plagosurve mund të ndryshojë, pasi operacionet e kërkim-shpëtimit vijojnë ende.