Ka dalë jashtë kontrollit situata me zjarret në fshatin Lundre të Matit, duke rrezikuar banesat, ndërsa dy familje u evakuuan nga policia. Flakët rrezikuan edhe dy stane bagëtish me rreth 100 gjedhë, por blegtorët nuk kanë pranuar evakuimin e tyre. Forca të shumta të emergjencave po punojnë në terren për izolimin dhe shuarjen e flakëve, ndërsa ndërhyrja po koordinohet si nga toka, ashtu edhe nga ajri. Vatra aktive zjarri ka edhe në malin e Dajtit, në Tiranë, ku po punojnë dhjetëra zjarrfikë, si dhe në Vajkal të Bulqizës, ku flakët janë përhapur në më shumë se 13 hektarë. Beteja me flakët vijon edhe në Therepel të Skraparit, ku po ndërhyhet nga toka dhe ajri. Ndërsa vatrat në Qafën e Lugut–Vithkuq dhe malin e Qukësit–Prrenjas janë nën mbikëqyrje dhe nuk paraqesin rrezik për zonat e banuara.