Për të dytën ditë rresht dhjetëra zjarrfikës sezonalë grekë protestuan në qendër të Athinës duke kërkuar punë të përhershme pasi kontratave të tyre u mbaroi afati , në fund të një sezoni të tmerrshëm zjarresh për të gjithë vendin. Protesta e dytë vjen disa orë pasi një grup zjarrfikësësh hynë me forcë në ndërtesën e Ministrisë së Mbrojtjes Civile dhe Krizës Klimatike dhe u përleshën me forcat e policisë. , mbrëmjen e së enjtes. Të paktën 14 vetë u plagosën ,ndërsa pati edhe 4 arrestime. Greqia punëson gati 14700 zjarrfikës të përhershëm , duke përfshirë edhe rreth 2,500, me kontrata gjashtëmujore . Këta të fundit kërkojnë kontrata vjetore pune pasi ekzistojnë sipas tyre mbi 4000 vende bosh në trupën e zjarrfikësve . Jemi këtu se duam të punojmë 12 muaj në vit. Kriza klimatike dhe ndryshimet klimatike nuk duhet të ekzistojnë vetëm në tabelat e ministrisë dhe tek fjalë madhështore. Kriza klimatike është këtu dhe ne jemi gati. Zjarret , që janë një fenomen i zakonshëm në Greqi, tashmë janë bërë më të shpeshta dhe shkatërruese pasi ditët me temperatura të larta, vapë përvëluese dhe errëra të fuqishme janë shtuar duke u kthyer në një normalitet për shumë muaj . Vetëm në periferinë e Athinës u regjistruan sivjet më shumë se 9,000 zjarre pyjore, duke djegur mbi 109,000 hektarë tokë këtë verë , e cila ishte nga më të nxehtat në dekadat e fundit , pas një dimri të butë me shumë pak rreshje. Ndërsa Ministri i Mbrojtjes Civile ka deklaruar se protestuesit ishin një pakicë dhe se në ditët ardhshme do të zhvillojë një takim me përfaqësues të zjarrfikësve sezonalë, partitë opozitare kanë kritikuar qeverinë që në verë i quante zjarrfikësit heronj që luftojnë me flakët, kurse tani dërgoi forcat policore për tu konfrontuar me ta.