I gjithë territori i Shqipërisë u përfshi nga një valë e re zjarresh në fundjavë. Sipas të dhënave zyrtare nga Agjencia Kombëtare e Mbrojtjes Civile në vend janë raportuar gjithsej 20 vatra zjarri. Prej tyre, 7 vatra mbeten ende aktive, 3 janë vendosur nën mbikëqyrje, ndërsa pjesa tjetër është izoluar. Një ushtri e tërë e forcave emenrgjente ndodhet në terren, ku janë angazhuar 284 forca operacionale dhe 33 automjete zjarrfikëse, të mbështetur nga 80 efektivë të Forcave të Armatosura dhe 2 helikopterë të Forcës Ajrore. Situata më e rënduar operacionale paraqitet në qarkun e Dibrës, ku janë përqendruar edhe forcat më të mëdha. Vetëm në vatrën e Sllatinës po operojnë 91 forca në përpjekje për të rrethuar flakët. Ndërkohë, në Vajkal operacioni vijon me 38 forca të MZSH-së dhe 30 efektivë të ushtrisë. Gjendja mbetet problematike edhe në Lundre të Matit, ku është dashur ndërhyrja nga ajri e një helikopteri të FA-së për të shmangur përhapjen, si dhe në Ballenjë të Martaneshit, ku zjarri po konsumon një zonë të mbrojtur me biodiversitet të lartë.EFEKTE Në qarkun e Tiranës, vëmendja kryesore është zhvendosur në Malin e Dajtit, në aksin drejt Qafë-Priskës. Aty po punohet pa ndërprerje me një koordinim mes 15 zjarrfikësve, 9 forcave të Administratës së Zonave të Mbrojtura (AdZM) dhe 20 efektivëve ushtarakë, të cilët po mbështeten edhe nga një helikopter nga ajri për të izoluar vatrën përpara se të përfshijë sipërfaqe të tjera pyjore. Në qarkun e Durrësit, konkretisht në Zallë të Fushë-Krujës, një vatër zjarri e riaktivizuar gjatë pasdites së të dielës ka vënë në lëvizje strukturat vendore. Në juglindje të vendit, në Qafën e Lugut në Vithkuq të Korçës, një vatër zjarri po djeg një sipërfaqe të konsiderueshme pyjore. Për shkak të terrenit jashtëzakonisht të thyer malor dhe pamundësisë teknike për të ndërhyrë gjatë orëve të natës, strukturat kanë vendosur që kjo vatër vetëm të monitorohet përgjatë orëve në vijim, për të rinisur operacionin e shuarjes në mëngjes. Ndërkohë, vatrat në malin e Dardhës dhe malin e Qukësit po mbahen në mbikëqyrje.