Qindra forca të emergjencave vijojnë përballjen me flakët në terren, ku gjatë orëve të fundit janë raportuar 23 vatra zjarri. Ministria e Mbrojtjes njofton se po luftojnë me flakët 26 automjete zjarrfikëse, 310 forca operacionale, 103 efektivë të Forcave të Armatosura, 3 helikopterë të Forcës Ajrore dhe 2 avionë “Air Tractor”. Situata paraqitet më problematike në Drenie të Bashkisë Patos, pas riaktivizimit të zjarrit në thellësi të pyllit. Në ndihmë të forcave zjarrfikëse dhe ushtrisë kanë shkuar edhe dy avionët, që po ndërhyjnë nga ajri për normalizimin e situatës. Në Krujë vijon puna në dy vatra. Në Abaze, situata mbahet në monitorim të vazhdueshëm dhe aktualisht nuk ka rrezik për zonat e banuara. Në Krastë–Halil, pas ndërhyrjes me aviionë situata u normalizua, por forcat operacionale vijojnë punën në terren. Një tjetër operacioni i rëndësishëm po zhvillohet në Gurë-Lurë të Dibrës, me dhjetëra forca zjarrfikëse de dy helikopterë të Forcave të Armatosura. Forcat po pozicionohen pranë banesave për të garantuar mbrojtjen e komunitetit dhe për të qenë të gatshme për çdo zhvillim të situatës. Vatra aktive zjarri ka edhe në Dajt, në Priskë të Madhe, në Malin e Nëmërçkës dhe atij të Dhëmbelit në Përmet, por pa rrezik për banesat.