Dy raste zjarri janë regjistruar gjatë ditës së sotme në territorin e Bashkisë Cërrik. Ndërsa zjarri i parë, i konstatuar gjatë orëve të mëngjesit, u lokalizua dhe u vu shpejt nën kontroll, situata u bë më e vështirë në mbrëmje, kur një tjetër vatër zjarri përfshiu një zonë në fshatin Shalës. Flakët morën përmasa të konsiderueshme dhe për shkak të afërsisë me banesat, si dhe me një pikë servisi, situata paraqiti rrezik për përhapjen e zjarrit dhe shkaktimin e dëmeve më të mëdha. Për përballimin e situatës ndërhynë dy grupe zjarrfikëse, të cilat punuan për izolimin e flakëve dhe parandalimin e avancimit të tyre drejt banesave dhe objekteve pranë zonës së përfshirë nga zjarri. Nga zjarri u dëmtuan disa pemë dekorative, ndërsa ndërhyrja në kohë e shërbimeve zjarrfikëse bëri të mundur shmangien e një situate më të rëndë. Pavarësisht rrezikut që paraqitën flakët, banesat pranë zonës nuk pësuan dëme.