Rajonet qendrore të Rusisë po përballen me zjarre ekstreme të nxitura nga një valë e pazakontë të nxehti, pas djegies së pyjeve të Siberisë më herët gjatë verës. Në rajonin Nizhny Novgorod në lindje të Moskës, nëntë avionë të ministrisë së emergjencave dhe Gardës Kombëtare lëshuan sot 129 ton ujë në një zjarr masiv që po përhapej në rajonin fqinjë të Mordovisë. Ministria tha gjithashtu se autoritetet po luftojnë me 15 vatra të egra zjarresh në Sverdlovsk në rajonin e Uraleve. Pamje të postuara sot në mediat sociale, tregonin flakët në të dyja anët e një autostrade kombëtare që lidh Jekaterinburg me qytetin e Perm në Urale. Autoritetet thanë se 1200 zjarrfikës janë dislokuar në zonë. Qeveria tha dje se po liron qindra milionë dollarë për mbrojtjen e pyjeve të vendit, duke kërkuar “të nxirren mësime” nga zjarret e sivjetshme në Siberi.