Kosova mbylli pasditen e të premtes pikën kufitare me Maqedoninë e Veriut, në Glloboçicë, për shkak të përhapjes së zjarreve. Vendimi u mor nga Ministria e Brendshme e Kosovës, pasi Qendra Kombëtare e Menaxhimit Kufitar në Kosovë, njoftoi se nga pala maqedonase zjarret janë afruar pranë rrugës së fshatit Jazhincë, në kufi. Vendet e Ballkanit dhe një pjesë e mirë e kontinentit evropian po përballen këtë javë me temperatura mbi 40 gradë Celsius. Agjencia për Menaxhim Emergjent në Kosovë ka bërë të ditur më 14 gusht se i ka regjistruar 61 vatra zjarri, dhe që shumica janë lokalizuar, por që flakët kanë shkaktuar dëme kolosale. Autoritetet në disa shtete kanë thënë se disa zjarre janë nisur edhe qëllimshëm dhe tashmë i kanë arrestuar disa persona që dyshohen për këtë shkelje. Shkencëtarët për klimën kanë thënë disa herë se disa dekada të nxjerrjes së gazrave serrë në atmosferë, kanë ndikuar në rritje të temperaturave globale. Bota është ngrohur për 1.1 gradë Celsius në krahasim me epokën industriale, ndërsa shtetet synojnë që ta mbajë atë nën 1.5 gradë Celsius, për të shmangur katastrofa të mëdha natyrore.