Situata e zjarreve në territorin e vendit mbetet shqetësuese, veçanërisht në qarkun e Dibrës ku era e fortë ka përkeqësuar situatën orët e fundit. Sipas bilancit zyrtar të Ministrisë së Mbrojtjes në 24 orët e fundit janë raportuar gjithsej 27 vatra zjarri, nga të cilat 3 mbeten aktive dhe jashtë kontrollit, 4 të tjera janë nën mbikëqyrje. Për përballimin e situatës janë dislokuar në terren 292 forca operacionale dhe 26 automjete zjarrfikëse. Ky operacion po mbështetet në pikat më të nxehta nga 80 efektivë të Forcave të Armatosura dhe 3 helikopterë të Forcës Ajrore. Pika më kritike e 24 orëve të fundit është regjistruar në Mallunxë të Matit. Si pasojë e erërave të forta, zjarri është riaktivizuar me shpejtësi duke ndryshuar drejtim dhe duke iu afruar fshatrave Mallunxë dhe Lis. Po në qarkun e Dibrës, në Vajkal të Bulqizës, zjarri ka përshkuar tashmë një sipërfaqe të gjerë prej mbi 18 hektarësh. Ndërkohë, në Lundre të Matit, flakët vijojnë të gëlltisin një masiv të konsiderueshëm pyjor. Në qarkun e Tiranës, vatra në aksin Dajt–Qafë Priskë vijon të jetë problematike. Nga ana tjetër, vatrat në Qafën e Lugut–Vithkuq, malin e Qukësit–Prrenjas dhe Iballë–Fushë-Arrëz janë stabilizuar dhe po mbahen nën mbikëqyrje. Kjo e fundit paraqiti vështirësi të mëdha për shkak të terrenit të thyer malor, duke detyruar ndërhyrjen nga ajri me helikopterët e ushtrisë gjatë ditës së djeshme.