Deri në orët e mbrëmjes kanë operuar nga ajri dhjetë aeroplanë zjarrfikës dhe tre helikopterë për të përballuar një zjarr të madh që ka shpërthyer pas mesidtës të së martës në zonën e Dervenit, pranë Selanikut. Flakët u përhapën me shpejtësi drejt pyllit aty pranë dhe iu afruan fshatit Liti, duke detyruar autoritetet të urdhërojnë evakuimin e banorëve. Zjarrfikësit kanë gjetur në fillim trupin e një 60 vjeçari që ka humbur jetën nga flakët . Gruaja e tij është shoqëruar për në spital me djegie trupore ,ndërsa në orët e vona të mbrëmjes u gjet edhe trupi pa jetë I djalit të tyre 12 vjeç ,brenda në shtëpinë e tyre që po digjej. Zjarri shpërtheu rreth orës 14:30 në një zonë me shkurre dhe, për shkak të erës dhe temperaturave të larta, u përhap shpejt në pyll. Përveç avionëve dhe helikopterëve , në operacion marrin pjesë mbi 110 zjarrfikës , tre ekipe speciale të zjarrfikësve pyjorë dhe 36 mjete zjarrfikëse. Për shkak të rrezikut, sistemi i emergjencës 112 dërgoi dy mesazhe paralajmëruese ku mes të tjerash , banorëve të fshatit Liti iu kërkua të largohen menjëherë drejt stadiumit të zonës dhe të ndjekin udhëzimet e autoriteteve. Forca të policisë dhe të shërbimit të urgjencës ndodhen në terren, ndërsa zjarrfikësit vazhdojnë përpjekjet për të vënë flakët nën kontroll dhe për të mbrojtur zonat e banuara. Mbi qiellin e Selanikut gjatë gjithë pasdites shiheshin avionët canadair që shkonin drejt detit për tu mbushur me ujë dhe me pas drejtoheshin drejt zonës ku zjarri është ende I pakontrolluar. Shërbimi zjarrfikës ka raportuar në 72 orët e fundit dhjetëra vatra zjarri në zona të ndryshme të vendit.