Harta e zjarreve në pyje përgjatë 7 muajve të 2026, pa përfshirë gushtin, të llogaritura nga Agjencia Kombëtare e Mbrojtjes Civile në sipërfare të prekura mbi 1 ha, rezulton të jetë në të gjithë Shqipërinë 1255 ha. Qarku më i dëmtuar deri tani është Vlora me 466 ha sipërfaqe të dëmtuar. Ndërsa muaji korrik kryeson me vatrat më aktive si dhe marsi. Mbyllja e verës po duket më sprovuese për Shqipërinë, që po përballet me zgjerimin e flakëve dhe vështirësisë së menaxhimit të zjarreve, duke sjell një situatë të përsëritur si në gushtin e një viti më parë. Kapaciteti kombëtar është i pamjaftueshëm kur flakët përhapen në shkallë të gjerë. Ky është një nga përfundimet që arrin raporti i Komisionit Europian për 2025, ku konstatohet se Shqipëria ka frekuencë të lartë në kërkesat për ndihmë ndërkombëtare nga Bashkimi Europian. “Kapacitetet e reagimit të Shqipërisë shpesh mbingarkohen, veçanërisht në rastin e zjarreve, duke rezultuar në kërkesa më të shpeshta për ndihmë ndaj Mekanizmit të Mbrojtjes Civile të BE-së”. Komisioni Europian vlerëson se Shqipëria ka nevojë të rishikojë planet e emergjencës dhe të përmirësojë infrastrukturën e paralajmërimit të hershëm. Gjithashtu kërkon që qeveria shqiptare të zhvillojë kapacitetet operative. Ndër të tjera, KE i lë detyrë Shqipërisë që të rregullojë komunikimin me qendrën e emergjencave civile në Bruksel për përballimin e krizave. Vendi duhet të krijojë lidhjen me Shërbimet Trans-Europiane të Telekomunikacionit midis Administratave (TESTA) si parakusht për t'u lidhur me Sistemin e Përbashkët të Komunikimit dhe Informacionit të Emergjencave (CECIS), së bashku me një përdorim më të mirë të Qendrës së Koordinimit të Reagimit ndaj Emergjencave të Komisionit. Për 2026, kryeministri Edi Rama ka deklaruar se Shqipërisë deri në fund të vitit do i shtohen 3 avionë zjarrfikës. Si dhe punonjësit e Drejtorisë së Përgjithshme të Mbrojtjes nga Zjarri dhe Shpëtimin, me vendim të këshillit të ministrave do të përfitojnë nga 20% deri në 50% të pagës për cdo orë shtesë në shërbim, ku nuk mund të tejkalojnë më shumë se 200 orë në vit.