Këto janë pamjet nga fshati Kashnjet i Lezhës, ku flakët rrethuan shtëpitë, duke shkrumbuar disa prej tyre. Forca të shumta të emergjencave ndërhynë menjëherë nga toka dhe ajri, duke evakuuar banorët, ndërsa vijon puna për shuarjen e flakëve. Në zonë është vendosur dhe një perimetër sigurie, pasi dyshohet se ka shpërthime fishekësh. Në total, në të gjithë vendin janë raportuar 27 vatra zjarri, 8 prej të cilave mbeten aktive. Ministria e Mbrojtjes njofton se në terren ndodhen qindra forca zjarrfikëse, të ushtrisë dhe helikopterët e Forcës Ajrore. Problematike vijon të jetë situata në Malin e Dajtit, me riaktivizimin e një vatre zjarri, por pa rrezik për zonat e banuara. Në Dibër, operacionet vijojnë në Vajkal, Lundre dhe Mallunxë–Lis, me angazhim të konsiderueshëm të forcave tokësore dhe mbështetje ajrore në zonat e Matit Ndërkohë, në Mnelë të Vogël të Vaut të Dejës, intensiteti i zjarrit është ulur dhe rreziku për zonat e banuara është shmangur, ndërsa vijon puna për shuarjen përfundimtare të flakëve.