Ministria e Mbrojtjes njofton se gjatë 24 orëve të fundit, në të gjithë territorin e vendit, janë raportuar 34 vatra zjarri. Prej tyre, pesë mbeten aktive, ndërsa dy të tjera janë nën mbikëqyrje. Për menaxhimin e situatës janë angazhuar gjithsej 481 forca operacionale dhe 44 automjete zjarrfikëse. Në mbështetje të strukturave vendore janë vënë në dispozicion edhe 105 efektivë të Forcave të Armatosura, dy automjete zjarrfikëse të FA-së, tre helikopterë dhe një avion “Air Tractor”. Sipas Ministrisë së Mbrojtjes, vatrat aktive janë përqendruar në qarqet Tiranë dhe Dibër. Në Malin e Dajtit vijon puna për shuarjen e zjarrit, pas riaktivizimit të tri vatrave. Në operacion janë angazhuar 25 forca zjarrfikëse dhe punonjës të Administratës së Zonave të Mbrojtura, si dhe 20 efektivë të Forcave të Armatosura. Në qarkun Dibër vijojnë të jenë aktive vatrat e zjarrit në Qafë të Helmës, Vajkal, Sllatinë dhe Komsi. Në Vajkal po punojnë 61 forca operacionale, mes të cilave 30 efektivë të Forcave të Armatosura. Në Sllatinë janë angazhuar 78 forca, ndërsa në Komsi operacionit i janë bashkuar edhe 25 efektivë të Forcave të Armatosura. Sipas raportimeve nga terreni, asnjëra prej këtyre vatrave nuk përbën rrezik për zonat e banuara. Në qarkun e Elbasanit, vatrat në Malin e Dardhës dhe Malin e Qukësit janë nën mbikëqyrje. Edhe në këto zona nuk raportohet rrezik për banesat dhe banorët. Gjatë ditës së djeshme u zhvilluan operacione të konsiderueshme edhe në Tërbaç dhe Vranisht të Himarës. Për shuarjen e flakëve u angazhuan forca tokësore, dy helikopterë dhe një avion “Air Tractor”. Ndërhyrje pati gjithashtu në Xhyrë të Librazhdit, ku, krahas forcave në terren, u angazhua edhe një helikopter i Forcave të Armatosura. Vatrat në Tërbaç, Vranisht dhe Xhyrë janë deklaruar të fikura. Agjencia Kombëtare e Mbrojtjes Civile po e ndjek në mënyrë të pandërprerë situatën në të gjithë territorin e vendit, në koordinim me prefekturat, bashkitë dhe strukturat e sistemit të Mbrojtjes Civile.