Probleme me zjarret ka pasur sërish në Pukë gjatë natës, por edhe në kodrën pranë Ujit të Ftohtë në Vlorë. Një vatër e re zjarri shpërtheu në fshatin Gojan i Vogël të Pukës rreth orës 01:00 të mëngjesit të sotëm, duke vënë në lëvizje strukturat e emergjencave. Në terren u angazhuan menjëherë 5 mjete zjarrfikëse dhe 18 zjarrfikës të Pukës, të mbështetur nga punonjës të Shërbimit Pyjor dhe banorë të zonës. Për shkak të rrezikut nga zjarri, gjatë mesnatës janë evakuuar gjashtë familje, banesat e të cilave rrezikoheshin nga flakë. Në orët e para të mëngjesit operacionit iu bashkuan edhe 20 efektivë të Forcave të Armatosura të pajisur me pompa shpine dhe mjete ndërhyrjeje. Në sinkronizim me ndërhyrjen nga toka, për të shuar flakët ndërhynë edhe dy helikoptertë duke bërë të mundur izolimin e plotë të vatrës problematike. Po ashtu raportohet të jetë izolur dhe të mbahet në kontroll edhe vatra tjetër e zjarrit në Pukë në zonën e Prozhëm-Shkodzë. Aktualisht nga tereni raportohet se rreziku iu është larguar banesave, ndërsa forcat zjarrfikëse po monitorojnë perimetrin për të parandaluar ndonjë riaktivizim të ri.