Zjarrfikësit në Portugali kanë arritur të marrin nën kontroll disa nga dhjetëra vatrat e zjarrit që kanë përfshirë vendin, ndërsa shqetësimet rriten për përkeqësimin e kushteve atmosferike që mund të përhapin më tej flakët. Rreth 2 mijë zjarrfikës, të mbështetur nga avionë dhe helikopterë, po luftojnë me shtatë zjarre madhore në veri dhe qendër të vendit. Dhjetëra zjarre të tjera janë në proces shuarjeje, por autoritetet paralajmërojnë se moti mund të sjellë "befasi të këqija". Një nga vatrat më agresive është ajo në Parkun Kombëtar pranë Ponte da Barca, ku kryebashkiaku Augusto Marinho kërkoi përforcime për fshatin Germil, që rrezikon të rrethohet nga flakët. "Po përpiqemi ta mbajmë nën kontroll, por pasditja mund të sjellë surpriza të pakëndshme", tha kreu i mbrojtjes civile, Marco Domingues. Edhe Spanja është përfshirë nga zjarret. Në Caceres, një vatër dogji mbi 2,500 hektarë duke detyruar evakuimin e gjashtë fshatrave dhe mbylljen e rrugëve. Një tjetër zjarr në Avila ka bllokuar fshatin El Arenal. Të dyja vendet kanë dhënë paralajmërime publike për rrezik maksimal, teksa temperaturat pritet të shkojnë deri në 40 gradë Celsius, të shoqëruara me erëra të forta. Instituti i Detit dhe Atmosferës i Portugalisë (IPMA) e ka klasifikuar pjesën më të madhe të vendit në rrezik “maksimal” ose “shumë të lartë” zjarri.