Një zjarr që ra në një pallat shumëkatësh në plazhin e Shkëmbit të Kavajës shkaktoi panik mes banorëve dhe pushuesve mbrëmjen e së hënës, duke detyruar evakuimin e godinës. Flakët dyshohet se nisën në kasetën shpërndarëse të energjisë elektrike në korridorin e katit të 9-të dhe më pas u përhapën në një nga apartamentet e pronarit të godinës, Enver Shala. Policia dhe zjarrfikësit mbërritën menjëherë në vendngjarje. Për shkak të lartësisë së pallatit, ndërhyrja ishte e vështirë, ndërsa tymi detyroi evakuimin e banorëve dhe pushuesve. Pas disa orësh, zjarri u shua, ndërsa gjashtë persona, turistë dhe banorë të objektit buzë detit, u dërguan në spital pasi shfaqën vështirësi në frymëmarrje nga tymi. Fatmirësisht, ata ndodhen jashtë rrezikut për jetën. Edhe pas shuarjes së flakëve, banorët dhe pushuesit vijuan të prisnin jashtë, deri në rikthimin e energjisë elektrike dhe sigurimin e plotë të godinës. Mes tyre kishte edhe turistë të huaj, të cilët, pas orësh në pritje, shpresonin të ktheheshin sa më shpejt në dhomat dhe apartamentet e tyre.