Të paktën shtatë persona humbën jetën dhe 13 të tjerë mbetën të plagosur pas një zjarri që shpërtheu në një ndërtesë në ndërtim e sipër në veri të Moskë, njoftuan autoritetet ruse, sipas TASS. Sipas shërbimeve të emergjencës, flakët shpërthyen në një ndërtesë banimi shumëkatëshe të papërfunduar në lagjen Aeroport dhe u përhapën në katin e dytë dhe të tretë, duke rrezikuar jetën e dhjetëra personave që ndodheshin brenda. Më shumë se 30 persona u shpëtuan nga vendi i ngjarjes, ndërsa besohet se deri në 200 persona mund të kenë qenë të pranishëm në momentin e shpërthimit të zjarrit. Zjarrfikësit përdorën pajisje ngritëse për të arritur në katet e sipërme, ndërsa ekipet e shpëtimit operuan brenda ndërtesës së mbushur me tym të dendur. Autoritetet konfirmuan se zjarri u vu nën kontroll pas ndërhyrjes së forcave zjarrfikëse, ndërsa prokurorët kanë nisur procedura penale për shkelje të mundshme të rregullave të sigurisë në ndërtim. Hetuesit po punojnë për të përcaktuar shkakun e zjarrit dhe për të zbardhur rrethanat e plota të kësaj ngjarjeje tragjike.