Në prej zonave më të frekuentuara turistike të Vlorës, Uji i Ftohtë pushuesit u panikosën për shkak tënjë vatre zjarri që ra në kodër shumë afër hoteleve dhe restoranteve të zonës. Flakët që nisën në shpatin e kodrës te Uji i Ftohtë u përhapën me shpejtësi. Për shkak të afërsisë së zjarrit me strukturat, disa komplekse hotelesh dhe restorantesh u rrezikuan seriozisht. Të alarmuar nga prania e tymit dhe flakëve, qindra turistë dhe qytetarë kanë lënë tavolinat dhe ambientet e lokaleve. Për arsye sigurie, disa biznese në këtë zonë mbetën përkohësisht pa furnizim me energji elektrike. Forcat zjarrfikëse të Vlorës dhe efektivët e policisë ndërhynë menjëherë. Pas më shumë se 30 minutash, zjarrfikësit mundën të lokalizojnë vatrën dhe të vënë nën kontroll situatën, duke shmangur më te keqen për pushuesit dhe bizneset. Shkaqet e këtij zjarri mbeten ende të panjohura, ndërsa policia dhe grupi hetimor po kryejnë verifikimet për të përcaktuar nëse bëhet fjalë për një pakujdesi apo për një tjetër rast të qëllimshëm të zjarrvënies.