Tre të mitur në Elbasan rezultojnë të zhdukur pasi janë larguar nga qendra sociale në të cilën akomodoheshin prej disa kohësh. Policia bën me dije se dy 13 vjeçarë dhe një 14 vjeç në bashkëpunim me njëri tjetrin janë larguar duke mos lënë asnjë informacion për vend ndodhjen e tyre. Denoncimi është bërë nga përgjegjësi i qendrës sociale sipas të cilit të mitur janë larguar në drejtim të paditur rreth mesditës së të enjtes. Top Channel mësoi se dy prej të miturve janë nga qyteti i Librazhdit dhe njëri nga Lezha. Edhe pse policia ka komunikuar me të afërm të tyre ende nuk ka asnjë informacion edhe pse kanë kaluar 24 orë nga zhdukja. Të miturit ishin strehuar në qendrën sociale për shkak të problemeve të mëdha social-ekonomike, apo si pasojë e rrezikut të trafikimit të mundshëm. Policia informon se po merren në pyetje të gjithë personat që mund të kenë dijeni për vendodhjen e adoleshentëve.