Kryenegociatorët e Kosovës dhe Serbisë, Besnik Bislimi dhe Petar Petkoviç janë ulur ballë përballë njëri tjetrit në Bruksel, me ndërmjetësimin e të dërguarit evropian për bisedimet, Miroslav Lajçak, në përpjekje për të gjetur një zgjidhje për çështjen e targave, që ka shtuar shqetësimet për tensione në veriun e Kosovës. “Shpresoj sinqerisht se do të arrijmë të gjejmë një zgjidhje sot për të ulur tensionet në terren dhe për të punuar drejt normalizimit të marrëdhënieve”, shkroi Lajçak në nisje të takimit. Të enjten skadon një shtyrje 48 orëshe e vendimit të qeverisë së Kosovës me kërkesë të shba-së për gjobitjen e atyre që nuk i kanë ndërruar targat e makinave të lëshuara nga Serbia me ato të Kosovës. Takimi i kryenegociatorëve pason atë të kryeministrit të Kosovës Albin Kurti dhe presidentit të Serbisë Aleksandër Vuçiç të hënën në Bruksel që nuk solli asnjë përparim. Kurti, kritikoi sot sërish shefin e diplomacisë evropiane Josep Borrell për ndryshim të agjendës dhe largimin nga tryeza e diskutimeve të planit evropian për normalizimin e marrëdhënieve. Pamjet: AFP