Presidenti i Këshillit Evropian, Antonio Costa, ka propozuar një mënyrë të re për të përshpejtuar procesin e zgjerimit të BE-së, duke lejuar që vendimet për hapjen e kapitujve të merren me shumicë të kualifikuar, në vend të konsensusit unanim mes vendeve anëtare. Ideja është diskutuar në samitin joformal të BE-së në Kopenhagen, nën presidencën daneze. Ky ndryshim do të ndikonte në zhbllokimin e vendeve që prej vitesh janë ndalur në vend, si Maqedonia e Veriut, e cila për më shumë se një dekadë është penguar nga Greqia dhe Bullgaria për arsye politike dhe historike. Aktualisht, përparimi i Ukrainës në negociata po bllokohet nga vetoja e Hungarisë. Megjithatë, propozimi po përballet me skepticizëm. Për ndryshimin e rregullave kërkohet gjithashtu konsensus, dhe disa vende, përfshirë Qipron, Greqinë, Bullgarinë e Kroacinë, nuk ishin të gatshme të heqin dorë nga e drejta për të bllokuar negociatat.