Takimi i Sali Berishës në Spanjë u mbyll me miratimin nga Partitë Popullore Europiane të rezolutës së propozuar nga Partia Demokratike. Rezoluta e miratuar nga PPE ngre disa shqetësime për situatën aktuale politike, teksa vendi ndodhet në prag të zgjedhjeve parlamentare të 11 Majit. “Zgjedhjet po minohen nga manipulimi dhe abuzimi me pushtetin; pluralizmi politik po shtypet përmes presionit institucional; dhe sundimi i ligjit nuk po garantohet, për shkak të kapjes së sistemit gjyqësor dhe pandëshkueshmërisë”. Partitë Popullore Europiane i bëjnë thirrje OSBE-ODIHR dhe Këshillit të Europës që të dërgojnë më shumë vëzhgues në Shqipëri, ndërsa theksojnë se do ndjekin nga afër gjithë procesin zgjedhor të 11 Majit. “PPE do të ndjekë nga afër zhvillimet në Shqipëri, duke mbështetur aspiratat e saj europiane dhe duke vijuar mbështetjen për forcat demokratike në vend. PPE do të bashkëpunojë me partnerët ndërkombëtarë për të siguruar që procesi zgjedhor të përputhet me parimet demokratike europiane dhe të ofrojë një kuadër për zgjedhje të lira dhe të ndershme”. Ndërkohë, edhe komisioneri Johannes Hahn, gjatë një takimi që pati me kreun e opozitës, Sali Berisha, tha se do ngrejë zërin për të gjitha problematikat e ngritura nga Partia Demokratike dhe që janë pasqyruar në rezolutë. Komisioneri Hahn theksoi se do jetë një avokat i fortë i Shqipërisë në forcimin e demokracisë dhe procesin e integrimit. Nga ana e tij, Sali Berisha u deklarua i kënaqur nga mbështetja që mori nga Kongresi i Partive Popullore Europiane, duke theksuar se forca e tij politike mundet ta afrojë Shqipërinë me Bashkimin Europian.