Zgjedhjet evropiane katër-ditore, me 27 vendet anëtare të BE u mbyllën sot. Rreth 370 milionë europianë kishin të drejtë vote për të zgjedhur 720 anëtarë të rinj të Parlamentit Europian mes 15 mijë kandidatëve. Teksa është hera e parë që nga viti 1979 që Britania e Madhe nuk voton në këto zgjedhje, me rëndësi po shihet rezultati në vendet e fuqishme të bllokut. Gjermania me popullatën më të madhe në Europë do të ketë numrin më të madh të anëtarëve, 96 prej totalit. Ndërsa Qipro, Luksemburgu dhe Malta me popullësinë më të vogël ju takon nga 5 anëtarë secili. Nga projeksioni i parë i parlamentit të ri Europian vihet re një zhvendosje e madhe djathtas në pjesën më të madhe të Europës, me partitë e gjelbërta dhe liberalët që do paguajnë kryesisht çmimin e humbjes së territorit… Udhëheqësit e Francës dhe Gjermanisë paralajmëruan përpara këtij votimi se e ardhmja e Evropës ishte në fletëvotim. Shumë votues janë goditur nga kostoja e jetesës, kanë shqetësime për migrimin dhe për tensionet gjeopolitike. Partitë e të djathtës ekstreme janë përqëndruar këtu duke fituar pikë. Votimi filloi të enjten në Holandë dhe në vende të tjera të premten dhe të shtunën, por pjesa më e madhe e votave të BE-së u hodhën të dielën, me Francën, Gjermaninë, Poloninë dhe Spanjën dhe Italia që pati ditën e dytë të votimit.