Zgjedhjet për kryetar bashkie në Himarë do të mbahen më 4 gusht. Menjëherë pas vendimit të KQZ për heqjen e mandatit të Fredi Belerit, qeveria njoftoi Presidentin e Republikës për vakancën e krijuar në bashkinë Himarë. Engjell Agaçi, sekretar i përgjithshëm në kryeministri, përmes një letre dërguar në presidencë, i kërkoi kreut të shtetit Bajram Begaj që të caktonte datën e zgjedhjeve të pjesshme për kryetar të bashkisë Himarë. Presidenti i Republikës, Bajram Begaj vetëm pak orë pas kërkesës dekretoi datën 4 gusht për zhvillimin e zgjedhjeve për kryetar bashkie në bashkinë Himarë. Në njoftimin zyrtar kreu i shtetit bën me dije se kjo datë është “alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”. Opozita reagoi duke e cilësuar shkelje të kushtetutës nga presidenti Begaj , sepse sipas kreut të grupit parlamentar të PD, Gazmend Bardhi, presidenti ka dekretuar zgjedhje pa një vendim të ekzekutueshëm. Aktualisht Himara drejtohet nga Arqile Bollano si kryetar i komanduar i bashkisë, ndërsa edhe ish-kryebashkiaku, Jorgo Goro ndodhet në burg për falsifikim dokumentesh dhe shpërdorim detyre.