Gati 84% e popullsisë gjermane votuan të dielën për zgjedhjen e qeverisë së re, pjesëmarrja më e lartë kjo e regjistruar ndoënjherë në votime që pas ribashkimit të Gjermanisë. Sipas Zyrës Federale të Statistikave numri i atyre që kanë të drejtë të votojnë në zgjedhjet e 23 shkurtit në Gjermani shkon në 59.2 milionë vetë rreth 1.2 milionë më pak se në vitin 2021. 30.6 milionë janë gra dhe 28.6 milionë janë meshkuj. 2.3 milionë të rinj votojnë për herë të parë - që përbëjnë 3.9 përqind të të gjithë votuesve me të drejtë vote. Për shkak të datës së zgjedhjeve të parakohshme rreth 400,000 më pak të rinj tani munden të votojnë sepse nuk kanë mbushur ende moshën 18 vjeçare. Ndërkohë, Bundestagu gjerman tashmë do të jetë i tkurrur, me numrin e ligjvënësve të tkurrur në maksimum 630, e kjo për shkak të reformës zgjedhore, e cila parashikon që parlamenti i 21-të i vendit të ketë mbi njëqind anëtarë më pak. Aktualisht janë 733 deputetë. Tani vetëm vota e dytë vendos për shpërndarjen e vendeve në parlament. Në zgjedhjet e Bundestagut mrën pjesë 29 parti, dukshëm më pak se në zgjedhjet e fundit të vitit 2021, kur u pranuan 47 parti. Sakaq, ishin pesë kandidatë për kancelarë, ndërkohë që nuk ka pasur kurrë kaq shumë kandidatë për kreun e ekzekutivit. Gjermanët shkuan në këto zgjedhje më pesimistë për standardet e tyre të jetesës se c`kanë qenë ndonjëherë në çdo kohë që nga kriza e madhe financiare e vitit 2008.