Në buletinin e parë mbi sigurinë e zgjedhjeve të nëntorit në Shtetet e Bashkuara të Amerikës, Zyrtarët e lartë të sigurisë së zgjedhjeve u bëjnë thirrje votuesve amerikanë që të mos i japin rëndësi pretendimeve të pabaza se zgjedhjet e ardhshme presidenciale do të manipulohen. Drejtuesja e Agjencisë Amerikane të Sigurisë Kibernetike theksoi se infrastruktura zgjedhore nuk ka qenë kurrë më e sigurt dhe komuniteti i palëve të interesuara në zgjedhje nuk ka qenë kurrë më i forte. Përpjekja e zyrtarëve amerikanë për të siguruar votuesit vjen pak më shumë se një muaj pasi agjencitë amerikane të zbulimit lëshuan një paralajmërim se armiqtë e Shteteve të Bashkuara, të udhëhequr nga Rusia, Irani dhe Kina, po përpiqen të ndërhyjnë në zgjedhjet e nëntorit. Agjencia Amerikane e Sigurisë Kibernetike tha se përpjekjet e tjera për të mbrojtur infraskrukturën e zgjedhjeve të ardhshme presidenciale përfshijnë një sërë provash sigurie të infrastrukturës zgjedhore, testime të saktësisë së makinave të votimit dhe masa të zgjeruara sigurie për të mbrojtur rrjetet kompjuterike të lidhura me infrastrukturën e zgjedhjeve.