Afër 3.7 milion kroatë iu drejtuan kutive të votimit në zgjedhjet parlamentare që u mbajtën të mërkurën. Në garë rivalët kryesorë janë kryeministri Andrej Plenkoviç dhe partia e tij konservatore në pushtet HDZ (Bashkimi Demokratik Kroat), që opozita e akuzon për korrupsion dhe nepotizëm. HDZ shfrytwzoi qasjen europiane, pasi kjo parti mbikëqyri anëtarësimin e Kroacisë në Bashkimin Evropian, miratoi përdorimin e euros dhe shteti përjetoi një bum turistik. Përballë ndodhet presidenti i Kroacisë, Zoran Milanoviç, i cili ka deklaruar se do të japë dorëheqje për t’u bërë kryeministër nëse Partia Social Demokrate e tij (SDP) merr pushtetin, me ndihmën e partive më të vogla. Qëndrimet e tij janë konsideruar shpesh pro ruse, pasi kundërshton ndihmën për Ukrainën. Megjithatë, sipas Exit Poll-eve të para, HDZ-ja e kryeministrit aktual, Andrej Plenkoviç është fituese e zgjedhjeve parlamentare. Sondazhi i Ipsos e vendos në vend të parë HDZ-në dhe partnerët me 58 mandate. E dyta renditet partia SDP dhe partnerët me 44 deputetë. Parlamenti kroat ka 151 deputetë. Sipas të dhënave të fundit nga Komisioni Shtetëror Zgjedhor deri në orën 16:30 pjesëmarrja ishte 50,6 për qind, dukshëm më e lartë se në vitin 2020, kur në të njëjtën periudhë ishte 34,04 për qind. Pamjet: AFP