Presidenti i Ukrainës, Volodymyr Zelensky, gjatë fjalimit të tij në sesionin e 80-të të Asamblesë së Përgjithshme të Kombeve të Bashkuara, bëri thirrje për rritje të mbështetjes ndërkombëtare për vendin e tij, ndërsa paralajmëroi për pasojat e neglizhencës ndaj agresionit rus në rajon. “Po, ne duam paqe. Por nëse një shtet dëshiron paqe, duhet të vazhdojë të investojë në armë sepse armët vendosin kush mbijeton,” deklaroi Zelensky. Ai theksoi se, edhe në mes të luftës, populli ukrainas mbetet paqedashës, por se pa ndihmë ndërkombëtare, siguria e vendit të tij është e pamundur. Nuk ka armëpushim sepse “Rusia refuzon”, thotë ai, duke shtuar se ata rrëmbejnë “mijëra” fëmijë ukrainas. Gjithashtu shtoi se pengesa për një armëpushim buron vetëm nga Moska. Zelensky paralajmëroi gjithashtu se anëtarësia në NATO nuk përbën siguri automatike, duke përmendur shkeljet e hapësirës ajrore të Polonisë dhe Estonisë nga Rusia. Ai kujtoi se vetëm pak ditë më parë, 19 dronë rusë kishin depërtuar në hapësirën ajrore të Polonisë, por vetëm katër prej tyre u rrëzuan. Një tjetër shqetësim i ngritur nga presidenti ukrainas ishte situata në Moldavi. Ai paralajmëroi se ky shtet është në rrezik nga ndikimi rus dhe u bëri thirrje vendeve evropiane që të mos e neglizhojnë. “Mos e humbni Moldavinë, ashtu siç u humbën Gjeorgjia dhe Bjellorusia,” tha ai. Zelensky kërkoi nga Bashkimi Evropian më shumë ndihmë konkrete për Moldavinë, jo vetëm deklarata politike. Ai bëri thirrje për mbështetje financiare dhe energjetike për vendin fqinj, si pjesë e përpjekjeve për të frenuar zgjerimin e ndikimit rus në rajon.