"Mijëra" trupa ukrainase po marrin pjesë në inkursionin që ushtria ka nisur në rajonin rus të Kurskut, me qëllim "dobësimin" e ushtrisë ruse, ndërkohë që Moska vazhdon sulmet e saj. Vetë presidenti i Ukrainës Volodymyr Zelensky, e ka pranuar për herë të parë që ushtria e tij është duke kryer ofensivë brenda rajonit perëndimor rus, me qëllim që ta dërgojë luftën në “territorin e agresorit”. “Ukraina është duke dëshmuar që mund të rikthejë drejtësinë dhe të garantojë presion ndaj agresorit”, ka thënë ai. Ukraina raportohet të ketë avancuar shpejt, më shumë se 10 kilometra brenda Rusisë. Më shumë se 76.000 njerëz janë evakuuar nga rajoni Kursk dhe autoritetet kanë nisur të zbatojnë masa kundër terrorizmit në atë zonë, dhe rajone tjera kufitare. Inkursioni ukrainas në Rusi, i nisur të martën u kryer me gati 1000 ushtarë, tanke dhe pajisje të armatosura. Prej atëherë, ukrainasit është raportuar të ketë fituar kontrollin e disa fshatrave, dhe janë duke kërcënuar për të fituar edhe qytezën rajonale ruse, Sudzha. Po ashtu edhe Rusia ka vijuar me sulmet e saj raketore. Kievi dhe disa rajone tjera janë përballur me sulme me raketa dhe dronë, që në orët e para të së dielës. Sipas zyrtarëve lokalë, një burrë 35-vjeçar dhe djali i tij katërvjeçar janë vrarë në rajonin e Kievit, si pasojë e këtyre sulmeve, ndërsa një tjetër 13 vjeçar ka mbetur i plagosur.