Lufta mes Rusisë dhe Ukrainë parashikohet të vazhdojë edhe gjatë këtij dimri, pavarësisht tentativave të presidentit amerikan, Donald Trump, për t’i dhënë fund. Bisedimet e fundit me të dërguarit e SHBA, Jared Kushner dhe Steve Witkoff, në Moskë dhe Kiev, ishin pozitive, por presidenti ukrainas, Volodymyr Zelensky, tha se lufta do të vazhdojë. “Ne shpresojmë sinqerisht të arrijmë marrëveshje me partnerët tanë amerikanë dhe mbështetemi në suportin e partnerëve tanë evropianë nëse lufta zgjatet gjatë dimrit, gjë që duket se është rasti në këtë moment”, tha Zelensky në një konferencë për shtyp pas bisedimeve. Në të njëjtën kohë, ai theksoi se çështja territoriale, e cila është një çështje qendrore në konfliktin midis Ukrainës dhe Rusisë, mund të zgjidhet vetëm përmes takimeve midis krerëve të shteteve. “Dua të këmbëngul në qëndrimin tim, i cili është se çështje të tilla komplekse mund të zgjidhen vetëm në nivelin e udhëheqësve”, tha ai në konferencën për shtyp pas bisedimeve me Kushner e Witkoff. Zelensky ka kërkuar prej kohësh një takim me homologun e tij Vladimir Putin për të zgjidhur çështjen territoriale, diçka që Kremlini ka refuzuar ta bëjë. Presidenti ukrainas tha gjithashtu se delegacionet amerikane dhe ukrainase diskutuan për sigurinë dhe garancitë ekonomike për Kievin, si dhe një plan prosperiteti.