Lëvizjet e fundit mes Shteteve të Bashkuara dhe Rusisë për t’i dhënë fund luftës në Ukrainë kanë krijuar jo pak trazira, ku duket se po krijohet një rend i ri botëror. SHBA dhe Rusia përjashtuan nga tryeza e diskutimeve Bashkimin Evropian, por edhe vetë Ukrainën. Kjo lëvizje ka krijuar pakënaqësi në të dyja kahet, si në BE, e cila u bashkua në një samit urgjent në Paris, i thirrur nga Presidenti Macron, por edhe në Ukrainë. Teksa në Riad të Arabisë Saudite, Sekretari Amerikan i Shtetit, Marco Rubio, arriti një marrëveshje me ministrin e Jashtëm të Rusisë, Sergey Lavrov, Presidenti Volodymyr Zelensky, dha një mesazh të fortë krah homologut të Turqisë, Recep Tayyip Erdogan, ndërsa lajmëroi se ka anuluar udhëtimin drejt Arabisë Saudite. Presidenti i Ukrainës njoftoi se kishte shtyrë për në 10 mars vizitën e tij në Arabinë Saudite, e cila ishte planifikuar për të mërkurën, në 19 shkurt, pasi sipas tij, nuk mund të mbahen bisedime pas “shpinës së Ukrainës” për t’i dhënien fund të luftës. Ai tha se për arritjen e paqes në Ukrainë, Shtetet e Bashkuara, Ukraina dhe Evropa duhet të marrin pjesë në bisedime për garancitë e sigurisë për Kievin. “Ne nuk ishim të ftuar në këtë takim ruso-amerikan në Arabinë Saudite. Ishte një surprizë për ne. Mendoj se ishte një surprizë për shumë njerëz. Ne jemi absolutisht të sinqertë dhe të hapur. Nuk duam që askush të vendosë prapa shpinës sonë. Asnjë vendim nuk mund të merret pa Ukrainën lidhur me përfundimin e luftës në Ukrainë. Nuk dua asnjë rastësi. Kjo është arsyeja pse unë nuk do të shkoj në Arabinë Saudite”, tha Zelensky, pas takimit me homologun turk, Recep Tayyip Erdogan. Nga ana e tij, Erdogan u shpreh se integriteti territorial dhe sovraniteti i Ukrainës janë të padiskutueshme për Ankaranë, në periudhën në vazhdim, duke shtuar se Turqia mund të ishte një vend i përshtatshëm për bisedime të mundshme paqeje që do të përfshinin Rusinë.