Zyrtarët evropianë dhe ukrainas në takimin në Londër të mërkurën do të përballen me propozimin e Shteteve të Bashkuara të Amerikës për ta njohur aneksimin ilegal të Krimesë nga Rusia dhe ngrirjen e linjave të frontit si pjesë e një marrëveshjeje të paqes raporton “The Washington Post”. Aleatët e Ukrainës po shpresojnë të fitojnë garanci për sigurinë dhe programe rindërtimi për vendin e shkatërruar nga lufta, në këmbim të lëshimeve të tilla territoriale. Propozimet e SHBA-së, të cilat i janë prezantuar Ukrainës në Paris javën e kaluar, përfshijnë mundësinë që SHBA-ja ta njohë zyrtarisht Krimenë e aneksuar si territor rus dhe eventualisht t’i hiqen sanksionet Rusisë në një marrëveshje në të ardhmen. Në këmbim, Moska do të ndalojë sulmet në Ukrainë. Një këshilltar i presidentit ukrainas, Volodymyr Zelensky, tha se “presioni që i është vendosur Ukrainës gjatë 24 orëve të fundit është i jashtëzakonshëm”. Pas publikimeve në media, presidenti i Ukrainës, Volodymyr Zelensky, reagoi duke thënë se refuzon që ta njohë Krimenë si territor rus. “Krimea është territor i yni, territor i popullit të Ukrainës. Ne nuk kemi asgjë për të biseduar për këtë temë”, tha Zelensky për mediat ukrainase. “Në momentin kur ne fillojmë të bisedojmë për Krimenë, për territoret tona sovrane, atëherë futemi në një format të zgjatjes së luftës. Kjo është ajo që do Rusia”. Rusia e ka aneksuar Krimenë nga Ukraina që në vitin 2014.