Fjala e presidentit amerikan, Donald Trump në Organizatën e Kombeve të Bashkuara ishte ndryshimi më i rëndësishëm i qëndrimit të tij për luftën në Ukrainë. Ndryshe nga qëndrimet se Ukraina duhet të lëshonte territoret me qëllim që t’i jepte fund luftës me Rusinë, Trump tha se besonte që Ukraina mund ta fitonte luftën dhe të rimerrte të gjithë territorin e pushtuar nga Rusia, të cilën gjithashtu e cilësoi një tigër prej letre. Pak ditë pas kësaj deklarate Presidenti amerikan u shfaq krah të presidentit Volodimir Zelensky, në kuadër të punimeve të Asamblesë së Përgjithshme të OKB-së në Neë Yokr. Foton me Trump ku shfaqen së bashku me bashkëshortet e tyre, Olena Zelenska dhe Melania Trump, e postoi vetë Zelensky, ku ndër të tjera kishte edhe një mesazh për presidentin amerikan. Zelensky e falënderoi Trump për mbështetjen e dhënë, duke u shprehur se “Amerika qëndron përkrah Ukrainës dhe ne e ndiejmë këtë. Ne falënderojmë popullin e Shteteve të Bashkuara, Presidentin Donald Trump dhe Zonjën e Parë Melania Trump për vëmendjen e tyre ndaj ukrainasve, ndaj fëmijëve tanë, ndaj popullit tonë. Ne qëndrojmë së bashku dhe kjo do të thotë se jeta do të mbrohet, ndërsa paqja dhe siguria do të jenë më pranë”.