Kina, Brazili ose India janë emrat e shteteve që presidenti rus Vladimir Putin do t’i konsideronte “ndërmjetës të ndershëm” në bisedimet për t’i dhënë fund luftës në Ukrainë. Duke folur tw enjten në një panel diskutimi në Forumin Ekonomik Lindor të Rusisë, Putini u pyet se cilat vende mund të udhëheqin bisedimet e paqes me Ukrainën. “Preferoj Republikën Popullore Kineze, Brazilin dhe Indinë. Unë jam në kontakt me partnerët e mi... ne kemi besim te njëri-tjetri. Nëse ekziston dëshira e Ukrainës për negociata, mund ta bëj”, ka thënë Putin. Komentet e Putinit erdhën pasi Kievi ka thënë se nuk do të ketë negociata të drejtpërdrejta me Rusinë, por po punon për të ndërtuar koalicion ndërmjetësish për të ndihmuar përfundimin e luftës. Në Ukrainë ka shpresë se disa shtete ndërmjetësuese, përfshirë edhe ato që janë me prirje nga Rusia, mund ta shtyjnë përpara formulën e paqes prej 10 pikash të presidentit ukrainas Vlodymyr Zelensky dhe që luftës, e cila ka filluar nga shkurti i vitit 2022, t’i jepet fund. Putin ishte në panel në Vladivostok së bashku me kryeministrin e Malajzisë, Anuar Ibrahim dhe zëvendëspresidentin kinez Han Zheng.