Rreth 3.750 hebrenj u strehuan dhe u shpëtuan në Shqipëri gjatë pushtimit nazist, sipas Autoritetit për Informimin mbi Dokumentet e ish-Sigurimit të Shtetit. Gentiana Sula, kryetarja e AIDSSH – Shqipëria vendosi njeriun mbi politikën, jetën mbi urdhrin, mikpritjen mbi frikën Në takimin e zhvilluar sot në Ditën Ndërkombëtare të Përkujtimit të Holokaustit, me studentët dhe mësuesit e historisë, në Autoritetin e Dosjeve u trajtua Besa, fjala e dhënë dhe solidariteti njerëzor i treguar nga shqiptarët ndaj hebrenjve gjatë Luftës së Dytë Botërore. Shkrimtari Marçel Hila, autori i librit “Rrufeja në shtëpinë e mikpritësit”, solli historitë dhe dëshmi e familjeve hebreje të strehuara në Shqipëri. Marçel Hila, shkrimtar - Më ka treguar një histori nëna ime, kur në Elbasan gjermanët kishin rrethuar një shtëpi. Alegri ishte një vajzë hebre që ishte strehuar bashkë me nënën dhe theu këmbët duke u hedhur nëpër mure për t’iu fshehur gjermanëve. T’I shpëtosh tjetrit jetën, ke bërë një akt më të madh se çdo gjë tjetër. Këta fshatarë shqiptarë kanë bërë këtë akt.