Një specie e re dhe gjigante insekti është zbuluar në pyjet tropikale malore të Queensland-it Verior në Australi, e cilësuar si insekti më i rëndë i gjetur ndonjëherë në vend. Bëhet fjalë për Acrophylla alta, një lloj i ri i insektit shkop, që arrin një gjatësi prej 40 centimetrash dhe peshon 44 gramë – sa një top golfi. Zbulimi u bë në një nga habitatet më të paarritshme të Australisë – kreshtat e lagështa të Tropikëve të Lagësht, një rajon i dendur e malor, që ka mbetur pak i eksploruar. Profesori Angus Emmott nga Universiteti James Cook, që ndihmoi në identifikimin e specieve të reja, shpjegoi se izolimi ekstrem i zonës është arsyeja pse ky insekt gjigant nuk ishte zbuluar më herët. “Trupi i tyre i madh ndihmon për të përballuar temperaturat e ftohta në lartësi. Kjo është një adaptim që ka ndodhur gjatë miliona viteve,” tha Emmott. “Për momentin, mendohet të jetë insekti më i rëndë në Australi.” Megjithëse i madh, insekti arrin të maskohet në mënyrë perfekte mes degëve të pemëve. Ai jeton shumë lart në kurorat e pyjeve dhe rrallë zbret në tokë, përveçse në raste si ciklone apo kur bie pre e ndonjë zogu – ndaj është pothuajse i padukshëm për njerëzit.