Dy fëmijë kanë vdekur nga një sulm me thikë në Angli, ndërsa 9 të tjerë janë plagosur. Ngjarja e rëndë ka ndodhur në zonën e Southport të Merseyside, ku një person filloi të sulmonte me thikë disa fëmijë dhe më pas edhe njerëz të tjerë. Policia ka arrestuar autorin, një adoleshent 17-vjeçar, i cili jetonte në një fshat aty pranë, ndërsa gjashtë persona të tjerë janë në gjendje kritike. Fëmijët që ndodheshin aty, po merrnin pjesë në një feste që si tematikë kishte këngët e superstarit Taylor Swift. Hetimi është ende në fazat e hershme dhe motivi është ende i paqartë, por policia nuk e ka quajtur si akt terrorist. Kryeministri Keir Starmer e quajti ngjarjen “të tmerrshme” duke shtuar se i gjithë vendi është thellësisht i tronditur”. Sulmuesi, i përshkruar si i veshur me një maskë në fytyrë, mbërriti në Hart Street me një taksi dhe refuzoi të paguante tarifën, sipas një dëshmitari lokal. Shumë njerëz raportuan se kishin parë disa fëmijë të vegjël të gjakosur në rrugë, pasi u goditën me thikë. Disa dëshmitarë thonë gjithashtu se dëgjuan një grua që vraponte në rrugë duke bërtitur “vajza ime është goditur me thikë” Pamjet: AFP