Hija e rivalitetit mes fuqive të mëdha po zgjerohet edhe në hapësirë. Një raport ekskluziv i “Financial Times” zbulon se Irani ka përdorur satelitë kinezë për të spiunuar bazat amerikane në Lindjen e Mesme dhe më pas për t’i goditur ato me raketa dhe dronë. Sipas të përditshmes britanike, Teherani siguroi akses në satelitin “TEE-01B” menjëherë pas lëshimit të tij në vitin 2024, përmes një marrëveshjeje me kompaninë kineze Emposat. Imazhet me rezolucion të lartë u përdorën për të monitoruar me detaje lëvizjet e ushtrisë amerikane në rajon. Një nga objektivat kryesorë ishte baza “Prince Sulltan” në Arabinë Saudite. Pamjet e regjistruara mes 13 dhe 15 marsit, sipas raportit, ndihmuan Pasdaranët të llogarisnin koordinata të sakta për një sulm me raketa, i cili dëmtoi rëndë disa mjete ajrore. Në shënjestër të vëzhgimit kanë qenë edhe baza të tjera të rëndësishme në Lindjen e Mesme. Sipas Financial Times, teknologjia kineze i dha Iranit avantazh të qartë në terren, pasi sateliti ofron cilësi më të lartë se sistemi iranian. Raporti nënvizon edhe një dobësi të bazave amerikane: mungesën e bunkerëve mbrojtës për avionët dhe personelin, duke i bërë objektivat më të ekspozuara ndaj goditjeve precize.