Forcat speciale arrestuan në Fushë Krujë, 31 vjeçarin Elmir Tufa i shpallur në kërkim prej më shumë se dy vitesh për vrasjen me paramendim të biznesmenit Shkëlzen Kastrati, ngjarje e ndodhur në 1 shkurt të vitit 2021 në Fier Forcat speciale ndërhynë në momentin që Tufa po lëvizte në aksin rrugor Fushë Krujë-Vorë. Gjykata e Fierit kishte caktuar për Elmir Tufën masën “arrest me burg”, ndërsa në pranga për vrasjen e Shkëlzen Kastratit është edhe Albert Zaja i cili u kap nga forcat renea në Fushë-krujë në prill të vitit 2021. Ndërkohë, në kërkim për ngjarjen janë Elson Xhecuka e Roland Cara, të cilët dyshohen se janë pjesë e një grupi vrasësish me pagesë. Kastrati u ekzekutua me dy plumba, njërin prej tyre në kokë, paraditen e 1 shkurtit, në fshatin Sheq në Fier brenda makinës së tij. Të gjitha hetimet për ngjarjen u përqendruan tek hakmarrja, për shkak të së kaluarës së tij dhe të vëllait, Klemend Kastrati. Ky i fundit rezulton të jetë implikuar në një plagosje të vitit 2008, për shkak të një sherri makinash, por edhe për një vrasje të ndodhur në vitin 2012. Për arrestimin e Tufës, ka reaguar edhe ministri i Brendshëm, Taulant Balla i cili përgëzoi forcat operacionale por shtoi se ka ende ngjarje të pazbardhura që nuk mund të harrohen nëse autorët nuk përballen me drejtësinë.