Të tjera detaje janë zbardhur nga ngjarja e rëndë e ndodhur këtë pasdite në fshatin Ndroq të Tiranës, ku pas të shtënave me armë zjarri mbeti i vdekur Alfred Dedja, rreth 50-vjeç. Sipas informacioneve të siguruara nga gazetarja e Top Channel Anila Haxha, autori i dyshuar i vrasjes, Julian Gjoshi, ishte mik me Dedjan. Në momentin e ngjarjes, viktima ka qenë duke drekuar me miqtë, kur në momentin që është futur në lokal 27-vjeçari, Dedja është ngritur për ta përqafuar, por ai e ka qëlluar me armë zjarri, pa i thënë asgjë. Policia po survejon zonën me qëllim kapjen e autorit, ndërsa mësohet se pasi ka shtënë disa herë me armë, i riu ikur nga vendngjarja me një mjet tip “Benz” të zi. Paraprakisht dyshohet se shkak i ngjarjes është bërë prishja e pazareve të drogës por hetimet e mëtejshme do të hedhin dritë mbi këtë vrasje.