Një shef i shërbimit sekret ushtarak i Rusisë në Qipro, me pozicionin zyrtar sekretar i tretë i ambasadës së Moskës në Nikosia, është gjetur i vetëvrarë në 8 janar. Sipas burimeve qipriote, zyrtarët e njoftuan policinë vetëm më 12. Aleksey Panov la një letër për të justifikuar veprimin e tij, por letra nuk iu dorëzua policisë. “Duhet të dërgohet në Moskë”, ishte përgjigjja. A mund të kontrollohet dhoma e Panovit ? “Jo”, ishte përgjigjja kategorike. Nga kryeqyteti rus vjen një sqarim i pjesshëm, përmes një faqeje interneti zakonisht të mirëinformuar: Panov nuk ishte thjesht një diplomat. Ai ishte kapiten i GRU-së, shërbimit sekret ushtarak. Dhe GRU-së, siç dihet, në vitet e fundit i janë atribuar disa vrasje dhe tentativa atentatesh, si ajo ndaj Sergej Skripalit, ish-spiun (po të GRU-së) që kishte kaluar në anën britanike, i goditur së bashku me vajzën e tij Julia në vitin 2018 me agjentin nervor Novichok (Noviçok). Vetëvrasja e tij është regjistruar vetëm një ditë pasi u raportua zhdukja e oligarkut rus Vladislav Baumgertner. Oligarku i fundit në listën e gjatë të zhdukjeve misterioze dhe vdekjeve “aksidentale” që nga fillimi i luftës në Ukrainë, kishte vendosur prej kohësh, me maturi, të largohej nga Rusia. Por zhvendosja në Qipro me gjasë nuk mjaftoi për ta shpëtuar: më 7 janar, 53-vjeçari Vladislav Baumgertner doli nga shtëpia e tij në Limassol, i veshur me bluzë dhe pantallona të shkurtra, dhe u zhduk pa lënë gjurmë. Që nga data 10, kur autoritetet u njoftuan, ka nisur një kërkim në shkallë të gjerë, edhe me ndihmën e dronëve dhe helikopterëve të dy bazave britanike të pranishme në Qipro. Por pa rezultat. Ishulli, prej vitesh në qendër të skenarëve të lidhur me çështje ruse, pasi është një nga pak vendet perëndimore që u lejon qytetarëve të Federatës Ruse të hyjnë pa vizë, duket sikur e ka “gëlltitur” atë. Në Nikosia, Limassol dhe qytete të tjera, rusët janë shumë të shumtë, edhe sepse këtu shumë prej tyre kanë depozituar kursime pak a shumë të ligjshme. Përmes shoqërive qipriote, për vite me radhë oligarkë rusë, bjellorusë dhe ukrainas kanë kontrolluar në hije kompani dhe konglomerate në vendet e tyre. Kështu, përveç “turistëve” dhe “biznesmenëve”, siç thuhet në Moskë, shteti evropian që aktualisht mban presidencën e radhës të Bashkimit Evropian është frekuentuar edhe nga spiunë të llojeve të ndryshme.