Presidenti i Serbisë, Aleksandar Vuçiç, ka rikonfirmuar zyrtarisht mbështetjen e palëkundur të Beogradit për integritetin territorial të Ukrainës, duke u bazuar në Kartën dhe rezolutat e Kombeve të Bashkuara. Deklaratën e bëri krah Volodimir Zelenskyt që po qëndron në një vizitë dyditore në Beograd. “Ajo që më duket më e rëndësishmja është se Serbia dhe unë, si presidenti i saj, mbështet Kartën e Kombeve të Bashkuara dhe rezolutat territoriale të Kombeve të Bashkuara dhe integritetin territorial të Ukrainës,” Kjo deklaratë erdhi në një moment mjaft kritik për Ukrainën. Zelensky paralajmëroi nga Beogradi se sulmet e fundit ajrore ruse e kanë lënë vendin e tij "pothuajse pa asnjë termocentral të paprekur" përpara fillimit të dimrit. Më tej Vucic bëri të qartë se pozicioni i Serbisë ndaj Rusisë mbetet i pandryshuar kur vjen fjala tek sanksionet. Serbia mbetet ndër të vetmet vende europiane që refuzon të sanksionojë Rusinë, aleatin e saj tradicional. Vuçiç mohoi gjithashtu zërat e Kremlinit për shitje municionesh në Ukrainë, duke thënë se Serbia ofron vetëm ndihmë humanitare dhe jo-ushtarake. Udhëheqësi ukrainas nga ana e tij kërkoi sanksione më të ashpra globale, duke u ankuar se pjesë të raketave ruse po vijnë ende nga pothuajse çdo kontinent, përfshirë shtetet partnere. Ky takim dyditor shënon vizitën e parë të Zelenskyt në Serbi që nga marrja e pushtetit në vitin 2019, duke treguar një lëvizje të rëndësishme në marrëdhëniet diplomatike të Ballkanit Perëndimor në vitin e katërt të luftës në Ukrainë.