Presidenti i Serbisë, Aleksandar Vuçiç, sfidoi Bashkimin Evropian dhe fluturoi këtë të mërkurë drejt Moskës, ku do të marrë pjesë në Paradën e Fitores, në Sheshin e Kuq. Pasi arriti në kryeqytetin rus, Vuçiç shkroi në Instagram se ishte "kthyer në Moskë pas shumë vitesh". "Krenar me luftën antifashiste të popullit serb dhe mirënjohës për ndihmën e madhe që kemi pasur nga Ushtria e Kuqe gjatë çlirimit të Serbisë", shkroi Vuçiç. Avioni i tij, gjatë udhëtimit drejt kryeqytetit rus më 7 maj, u ndal fillimisht në kryeqytetin e Azerbajxhanit, Baku, sipas Radiotelevizionit të Serbisë, dhe më pas vazhdoi fluturimin drejt kryeqytetit rus. Sipas Kremlinit, më 9 maj është paraparë një takim dypalësh ndërmjet presidentit të Serbisë, Aleksandar Vuçiç, dhe presidentit të Rusisë, Vladimir Putin. Në fillim të marsit, Vuçiç njoftoi se do të merrte pjesë në paradën ushtarake me rastin e Ditës së Fitores kundër fashizmit, pas një bisede telefonike me Putinin. Rusia më 9 maj shënon 80-vjetorin e fitores kundër fashizmit në Luftën e Dytë Botërore me një paradë ushtarake në Sheshin e Kuq në Moskë, si dhe me një sërë aktivitetesh të tjera. Më herët, Bashkimi Evropian paralajmëroi Vuçiç se, nëse shkon në Rusi, unioni do ta ketë shumë të vështirë të ndihmojë Serbinë në rrugëtimin europian.