“Jam krenar për rrugët, hekurudhat, rritjen e rrogave dhe pensioneve, por asnjë fushë tjetër nuk krahasohet me progresin drastic që ka pësuar ushtria serbe. Paga mesatare e një ushtari ishte 330 euro, tani është gati katër herë më e lartë. Armët dhe pajisjet tona meritojnë të gjithë lavdërimet. Ne kemi punuar me raketat për tetë apo nëntë vjet. Sot kemi katër herë më shumë dronë të ekspozuar sesa dikur”: Në fjalimin e tij drejtuar të pranishmëve që ndoqën stërvitjen e quajtur “Flamuri 2024”, e cila po zhvillohet në Batajnicë me rastin e Ditës së Bashkimit, Lirisë dhe Flamurit Kombëtar, presidenti serb Aleksandar Vucic rreshtoi arritjet në drejtimin e përmirësimit të forcave ushtarake të vendit, ku vecoi sidomos tanket operacionale, për të cilat tha se Serbia mund të renditet pa frikë “e para apo e dyta në Europë”. “Unë njoh 15 vende që së bashku kanë aq tanke sa ka ushtria jonë”, u shpreh me mburrje presidenti serb nga aeroporti ushtarak "Milenko Pavloviç", ku u ekspozuan armatime dhe pajisje të shumta moderne ushtarake. ““Unë njoh 15 vende që së bashku kanë aq tanke sa ne. Unë isha këtu në vitin 2013 dhe as që mund ta ëndërronim këtë. Askush nuk e tregoi HQ-17, kemi radarë të rinj... 50% e prodhimit është në Serbi, dhe kjo na bën një nga ushtritë më të armatosura në Europë në raport me popullsinë”, deklaroi ai. Autoritetet serbe paralajmëruan së fundi kthimin e shërbimit të detyrueshëm ushtarak, pa përmendur ndërkohë hulumtime përkatëse për nevojën e një mase të tillë.Sipas paralajmërimeve të Qeverisë, shërbimi i detyrueshëm ushtarak, i cili është hequr më 1 janar të vitit 2011, do të rikthehet në vitin 2025.