Presidenti serb Aleksandar Vuçiç u kërkoi falje qytetarëve pasi Serbia votoi në favor të një rezolute të Kombeve të Bashkuara që bën thirrje për një paqe të drejtë dhe të qëndrueshme në Ukrainë. “Mendoj se Serbia ka bërë një gabim dhe për këtë u kërkoj falje qytetarëve. Unë e marr unë përsipër fajin për këtë rast sepse ndoshta jam i lodhur dhe shumë i ngarkuar e ndoshta nuk mund të bëj gjithçka si duhet,” tha Vuçiç për mediat e vendit të tij. Vuçiçi ka theksuar se Serbia do të kishte bërë më mirë të abstenonte në votimin për rezolutën evropiane, ashtu siç kishte bërë edhe për rezolutën e mbështetur nga SHBA-të. Ai pranoi se ky hap mund të ketë pasoja negative për Serbinë në BE, por e mbrojti si një veprim të nevojshëm për të ruajtur një balancë mes Rusisë dhe Evropës. “Siç mund edhe ta merrni me mend, këtë po e them në një moment kur është fare e qartë se do të humbas pikë politike në Bashkimin Europian. E megjithatë, unë mendoj se Serbia duhej të abstenonte”, tha Vuçiç.