Përmes një fotoje në profilin e tij në Instagram, presidenti serb Aleksandar Vucic tregoi sesi po përgatitet për javën e ardhshme, kur e pret një darkë pune në Bruksel me liderët e Ballkanit Perëndimor, përfshirë dhe kryeministrin e Kosovës Albin Kurti. ““Byrek dhe kos, përgatitje e shkëlqyeshme për javën e vështirë përpara. Ne kemi takime të rëndësishme e besoj dhe të suksesshme në Lubjanë, Bruksel dhe Pragë. Parimet politike janë forca jonë, dhe bashkëpunimi me Europën dhe botën na garanton siguri ekonomike dhe një të ardhme më të mirë për ne. Rroftë Serbia”, shkroi Vucic në krah të fotos. Takim joformal, i thirrur nga shefi i diplomacisë europiane, Josep Borrell shihet si një zhvillim i dobishëm në përmirësimin e marrëdhënieve bilaterale mes shteteve. Ai do të përbëjë të parën herë që Vucic dhe kryeministri Kurti takohen përballë. një ditë më parë, presidenti serb iu rikthye temës së ndryshimit të kufijve, duke thënë se është kundër saj, por shtoi se një ide e tillë do të mund të gjente zbatim nëse do të mandatohej nga Kombet e Bashkuara ose një institucion tjetër.Gjatë javëve të fundit, mediat në rajon, por edhe më gjerë, kanë shkruar për idetë për ndryshimin e kufijve të vendeve në rajonit të Ballkanit si mundësi për të zgjidhur çështjet e mbetura si të pazgjidhura nga procesi i shpërbërjes së ish-Jugosllavisë.