Prokuroria e Utah njoftoi se do të kërkojë dënim kapital për Tyler Robinson, 22 vjeç, i akuzuar për vrasjen e aktivistit të njohur të krahut të djathtë, Charlie Kirk. Lajmi është bërë i ditur të martën nga Prokurori Jeff Gray, gjatë një deklarate për shtyp. Robinson, i cili u arrestua javën e kaluar, do të qëndrojë në paraburgim pa të drejtë lirimi me kusht. Ai pritet të dalë për herë të parë para gjykatës përmes një seance dëgjimore virtuale që pritet të mbahet gjatë 48 orëve në vijim. Prokuroria ka ngritur një sërë akuzash të rënda ndaj 22-vjeçarit, përfshirë vrasje të rëndë, përdorim të paligjshëm të armës së zjarrit, manipulim të dëshmitarëve dhe pengim të drejtësisë. Akuza kryesore është vrasja në rrethana të rënda, ku bazohet edhe kërkesa për dënimin me vdekje në shtetin e Utah. Sipas prokurorit “Charlie Kirk u vra ndërsa ushtronte një nga të drejtat më themelore që garanton Kushtetuta amerikane: të drejtën e fjalës së lirë”. “Kjo është një tragjedi për vendin tonë.”, tha Grey. Ai shtoi se plumbi që goditi për vdekje Kirk-un në qafë, kaloi shumë pranë disa pjesëmarrësve të tjerë, përfshirë fëmijë që ndodheshin në vendngjarje. Ky fakt është konsideruar si një rrethanë rënduese, që e përkeqëson më tej pozitat e të pandehurit.