Një pilot i lartë ukrainas u vra kur një avion luftarak F-16 i prodhuar në SHBA u rrëzua të hënën, vetëm disa javë pasi avionët e shumëpritur mbërritën në vend, konfirmoi një burim ushtarak ukrainas për CNN. Forcat e Mbrojtjes së Ukrainës nuk besojnë se pas incidentit qëndron gabimi i pilotit. Piloti Oleksiy Mes, i njohur si “peshku i hënës”, u vra në përplasje ndërsa “zmbrapsi sulmin ajror më të madh ndonjëherë” nga Rusia kundër Ukrainës, tha burimi, duke shtuar se piloti u varros të enjten. Presidenti ukrainas Volodymyr Zelensky tha të martën se Forcat Ajrore të Ukrainës përdorën F-16 për të shkatërruar raketat dhe dronët e lëshuar nga Rusia të hënën, duke konfirmuar për herë të parë se avionët po përdoreshin në luftime. Ne hetimin që ka nisur nga autoritetet, pritet të marrin pjesë edhe ekspertë ndërkombëtarë. Vdekja e pilotit është një goditje e madhe për Ukrainën. F-16-ët e parë mbërritën në vend vetëm në fillim të këtij muaji dhe “Moonfish” ishte një nga pilotët e paktë të trajnuar për të pilotuar këto avionë, që Kievi i priste prej kohësh. F-16 mund të sigurojnë mbulim ajror për trupat, të sulmojnë objektivat tokësore e aeroplanët e armikut si dhe të përgjojnë raketa. Me armatimin e duhur, F-16 mund të pengojnë avionët luftarakë-bombardues rusë të afrohen në fushën e betejës.