Ushtria izraelite njoftoi se vrau komandantin e lartë të Hamasit, Raed Saed, një nga arkitektët e sulmeve të 7 tetorit 2023 kundër Izraelit. Agjensia Franceze e lajmeve AFP ka publikuar pamjet e sulmit ndaj një makine përgjatë rrugës bregdetare Rashid në Gaza. Mësohet se automjetin e drejtonte Saed. Autoritetet shëndetësore të Gazës thanë se sulmi ndaj makinës vrau pesë persona dhe plagosi të paktën 25 të tjerë. Saad shërbeu si shef i selisë së prodhimit të armëve të Hamasit dhe konsiderohej i dyti pas shefit të fundit ushtarak të grupit terrorist, Izz al-Din Haddad. Në një deklaratë të përbashkët, kryeministri izraelit Benjamin Netanyahu dhe ministri i Mbrojtjes Israel Katz thanë se Saed u shënjestrua në përgjigje të një sulmi nga Hamasi në të cilin një pajisje shpërthyese plagosi dy ushtarë. Që nga hyrja në fuqi e armëpushimit mes Gazës e Izraelit ky atentat shënjon profilin më të lartë të një figure të Hamas që sulmohet për vdekje. Hamasi lëshoi një deklaratë duke e dënuar sulmin si shkelje të marrëveshjes së armëpushimit, por nuk e konfirmoi statusin e Saedit dhe as nuk kërcënoi me hakmarrje të menjëhershme. Armëpushimi, i cili hyri në fuqi më 10 tetor, ka lejuar një numër të madh palestinezësh të zhvendosur të kthehen në zonat e dëmtuara rëndë të Qytetit të Gazës. Forcat izraelite janë tërhequr nga disa pozicione urbane dhe shpërndarja e ndihmave është rritur. Por pavarësisht armëpushimit, dhuna ka vazhduar. Autoritetet shëndetësore palestineze thonë se të paktën 386 persona janë vrarë në sulmet izraelite që nga fillimi i armëpushimit, ndërsa Izraeli thotë se tre ushtarë të tij janë vrarë në të njëjtën periudhë dhe se ka vazhduar të shënjestrojë luftëtarë të armatosur.