Tre ushtarë izraelitë janë vrarë nga një polic egjiptian pas të shtënave në territorin e Izraelit pranë kufirit me Egjiptin. Një hetim me ushtrinë egjiptiane është nisur, ndërsa Egjipti raportoi se oficeri i saj i sigurisë kishte kaluar një pikë kontrolli ndërsa ndiqte trafikantët e drogës. Ushtria izraelite tha se të shtënat supozohej të kishin lidhje me një operacion kontrabande droge që kishte kryer gjatë natës. Sipas tyre një ushtar dhe një ushtare, të vendosur në një vend të largët përgjatë kufirit u qëlluan për vdekje. Trupat e tyre u zbuluan pasi një oficer i lartë nuk ishte në gjendje të kontaktonte me ta. Disa orë më vonë, pas një operacioni kërkimi, autori u rrethua dhe pati një shkëmbim zjarri, ku mbeti i vrarë edhe një ushtar. Një tjetër ushtar u plagos në atë shkëmbim. Sipas BBC në një deklaratë të paqartë, ushtria egjiptiane raportoi se oficeri i saj i sigurisë po ndiqte kontrabandistët e drogës dhe se një shkëmbim zjarri çoi në vdekjen e izraelitëve. Kontrabanda me vlerë rreth 400,000 dollarë u kap nga forcat izraelite gjatë operacionit gjatë natës. Ushtarët po vazhdojnë të kërkojnë në zonë për të tjerë që mund të jenë përfshirë, ndërsa ende është e paqartë se si polici arriti të hyjë në Izrael nga Egjipti. Forcat ajrore izraelite kanë mbështetur ushtrinë egjiptiane në luftën e saj kundër të ashtuquajturve militantë të Shtetit Islamik në pjesën veriore të Gadishullit Sinai. Tentativat për kontrabandë droge në zonë mbeten të shpeshta. Kufiri shtrihet rreth 255 km, duke e bërë të vështirë për patrullat e sigurisë. Dhjetorin e kaluar, ushtarët izraelitë qëlluan për vdekje një të dyshuar që me sa duket po përpiqej të kontrabandonte drogë në Izrael.